20 di JANERU (1973-2009)

Cabral ka mori. cabral e tudu noz. Ta duem o ki ta txiga 20 di Janeru, ta duem dentu petu pamo ta dam raiva so di rikorda kuze ke 20 di Janeru, kuze ki nu ta "silebra", kuze ki nu ta lembra tudu anu. Oji n ta odja nha tera ta gabadu na munti kau, ku progresu, ku dimokrasia, ku dizemvolvimentu, tudu frutu di sangi ki kori na matu di Guiné, di Angola di Moçambique. N ta rikorda Amilcar Cabral i tudu kes ki luta na si ladu ki da ses vida pa nu podi vivi nos vida sima nu sta vivi.

Dia 20 di Janeru ku forsa di arma es fazi um Heroi di povu bira imortal, danu maz forsa pa luta pa um Kabu Verdi i Guiné midjor, um Afrika midjor, um mundu midjor. Oji tudu sta konkretiza.

Dia 20 di Janeru di 2009 ku forsa di votus es fazi um kaminhu diferenti pa merka i pa mundu. Luther King djudadnu sunha primeru, noz ki tem ki konkretiza. Marxa di negru merkanu dja lebanu pa kaminhu di mudansa. Kel ki sta faltaba pa mundu korda pa avansa. Barack Hussein Obama um negro na Casa Branka. Será ki n ta odja um negru ta manda na brasil, na UK, na Holanda, na Portugal? Será ki um branku na Zimbabue, na Angola é posivel? Um mudjer na Irão ou na Iraki? Um mudjer na merka? Kinhentus anus di diskubrimentu kantu di orijem afrikanu nu ta odja na parlamentu portuges?

Boa sorti Obama.

SIM NU PODI.

BESPA MUDANSA - BESPA LEMBRANSA

Na kel tempu na dia 20 di Janeru di 1973 es mata Amilcar Cabral (ma noz tudu sabi ma kabral ka mori), kel dia marka povu di kabu verdi, di Guiné, di Afrika i di Mundu. Cabral era omi di mundu ka so di Afrika. Um mundu midjor, Paz pa tudu omi, ku dignidadi i felisidadi. Kela era sonhu di kel Omi. Dipoz di 36 anu nu ta lembra di Cabral ku algum speransa na petu ma si dizeju podi kontisi, infelizmenti, na dia di aniversariu di si asasinatu. Mudansa dja txiga kaza branka. Barack Obama ta ser 44º prizidenti i primeru negru kumandanti di kel pais ke "izemplu" di dimokrasia i liberdadi, um pais undi Negru tevi ki luta ku tudu forsa pa txiga undi branku txiga. Na tera undi unikus nativus kuazi dja ka tem, brankus ku negrus tudu é "stranjerus". Cabral ka mori - Obama dja nasi. Manham e dia di lembransa pa pripara pa mudansa.

SIM NU PODI.

BOM 2009

Fladu fla ka ta skrebi.
Kel ki ka fladu e segredu.

Na Janeru nu entra sabi.
Fevereru nu brinka.
Março kumesa doduna.
Abril 7 anu na si ladu.
Maio ka sabi rekorda.
Junho la ponta du matu.
Julho 6 anu ta bai.
Agosto dentu kentura.
Setembro na primera klasi.
Outubro é sabi ku ka sabi.
Novembro nha kodé.
Dezembro nu goza na saida.

Bom 2009